Factura electrónica e VERIFACTU: que cambia e cando afecta á túa empresa

XESTIÓN EMPRESARIAL · FACTURACIÓN

Facenda anunciou que quere coordinar a adaptación dos programas coa chegada da factura electrónica para os negocios de menor tamaño. A intención é trasladar as obrigas pendentes dos programas a outubro de 2028, pero o adiamento aínda necesita aprobación.

Desde AGAEXAR, a partir da información publicada pola FEEJ e das fontes oficiais, aclaramos o esencial para que poidas planificar os cambios coa túa asesoría e con quen che proporciona o programa de facturación.

Factura electrónica: cambiará como facturas a outras empresas

Se a túa empresa factura o mantemento dun xardín a outra empresa ou a un profesional, esas facturas deberán emitirse e recibirse mediante o novo sistema electrónico cando corresponda. Enviar un PDF por correo non será suficiente por si só.

O calendario aprobado distingue dous grupos:

• Máis de 8 millóns de euros de volume de operacións para os efectos do IVE no ano anterior: desde o 6 de outubro de 2027.
• O resto de empresas e profesionais incluídos nesta obriga: desde o 6 de outubro de 2028.

Estas datas corresponden á facturación entre empresas e profesionais. As facturas a particulares ou a administracións públicas teñen un tratamento diferente.

VERIFACTU: ten que ver co programa que utilizas

Ademais de cambiar como se intercambian as facturas, aprobáronse requisitos para que os programas de facturación conserven rexistros fiables e deixen constancia dos cambios.

Estes programas denomínanse sistemas informáticos de facturación, ou SIF. VERIFACTU é unha das formas de cumprir eses requisitos: envía automaticamente os rexistros de facturación á Axencia Tributaria. Tamén existe unha opción sen ese envío automático, con outras esixencias.

Polo tanto, adaptar o programa de facturación non significa necesariamente ter que escoller VERIFACTU.

Adiouse ata 2028?

Á data de revisión desta noticia, 11 de outubro de 2026, a Axencia Tributaria mantén os prazos aprobados para quen teña a obriga de adaptar o seu programa:

• Antes do 1 de xaneiro de 2027: contribuíntes do Imposto sobre Sociedades.
• Antes do 1 de xullo de 2027: o resto de obrigados, entre eles os autónomos incluídos na norma.

O anuncio é relevante para planificar, pero aínda non substitúe esas datas.

Tamén haberá que informar sobre as facturas e os seus pagamentos

A factura electrónica incorporará información sobre a súa aceptación ou rexeitamento e sobre o pagamento. Esta obriga ten o seu propio calendario: comeza o 6 de outubro de 2027 para quen supere os 8 millóns; o 6 de outubro de 2028 para o resto de sociedades e entidades, cunha excepción: para as persoas físicas e entidades en atribución de rendas que non superen ese volume, comeza o 6 de outubro de 2029. Sempre dentro do ámbito da norma.

Por onde empezar

Antes de cambiar de programa, pregunta ao provedor se pode adaptar o que xa utilizas e se ten previstos ambos os cambios: os requisitos do programa de facturación e o intercambio de facturas electrónicas con outras empresas. A túa asesoría pode axudarche a confirmar que obrigas che corresponden e que datas debes ter en conta.